जाजरकोट/
कर्णाली प्रदेश सरकारका आर्थिक मामिला तथा योजनामन्त्री बेदराज सिंहले जनशक्ति अभावका नाममा सेवा प्रवाह रोकिन नहुने बताउनु भएको छ।
बुधबार जाजरकोट सदरमुकाम खलंगामा जिल्लास्थित सरकारी कार्यालयका प्रमुखहरूसँगको छलफल कार्यक्रममा मन्त्री सिंहले जिल्लाका धेरै कार्यालय र प्रदेशस्थित मन्त्रालयहरूमा जनशक्ति अभाव रहेको प्रसङ्ग उल्लेख गर्दै सेवा प्रवाह भने रोकिन नहुने बताउनु भएको हो । मन्त्री सिंहले जनशक्ति व्यवस्थापनका लागि आफ्नो मन्त्रालयले आवश्यक समन्वय गर्ने प्रतिबद्धता जनाउनुभयो ।
`जनशक्ति अभावले सेवा प्रवाह रोकिनु हुँदैन । जनतालाई दु:ख दिनु हुँदैन । जनशक्ति व्यवस्थापनमा हाम्रो मन्त्रालयले केही गर्नुपर्छ भने भन्नुहोला । हामी सहमति दिन तयार छौं´, मन्त्री सिंहले भन्नुभयो ।
मन्त्री सिंहले जनशक्ति अभावले बजेट तथा कार्यक्रम कार्यान्वयन हुन नसकेको हो भने त्यसमा ध्यान दिइने बताउनुभयो । उहाँले जनतालाई केन्द्रमा राखेर सेवा प्रवाह गर्न कार्यालय प्रमुखहरूलाई निर्देशन दिनुभयो । मन्त्री सिंहले तर्जुमा गरिएका योजनालाई नतिजामुखी बनाउन आवश्यक रहेको बताउनुभयो ।
`योजना तर्जुमा गरेर मात्र हुँदैन, त्यसलाई नतिजामुखी बनाउनुपर्छ । बजेट कार्यान्वयनका विषयमा अप्ठ्यारा छन् । निर्माण व्यवसायीका कारण भएको हो भने कडाई गर्नुहोस् । प्राकृतिक विपत्तिबाहेक अन्य अवस्थामा ठेकेदार कम्पनीको म्याद नथप्नुहोस्´ मन्त्री सिंहले निर्देशन दिनुभयो ।
विकासलाई गुणस्तरीय बनाउन समेत मन्त्री सिंहले निर्देशन दिनुभयो । अबका योजनानालाई नतिजामुखी बनाउनुको विकल्प नरहेको मन्त्री सिंहले बताउनुभयो ।
