जाजरकोट ।
भेरी नगरपालिका जाजरकोटले लागुऔषध दुव्र्यसनी रोकथाम तथा नियन्त्रण सम्बन्धि अभिमुखिकरण कार्यक्रम सञ्चालन गरेको छ । बिहिबार भेरी नगरपालिका ३ खलंगामा रहेको रिद्धि होटेलमा पालिकाले अभिमुखिकरण कार्यक्रम सञ्चालन गरेको हो । कार्यक्रममा भेरीप् नगरपालिकाका कर्मचारी,शिक्षक,पत्रकार,यूवा र बालबालिका लगायत प्रहरीको पनि उपस्थिति रहेको थियो । कार्यक्रमको प्रमुख अतिथिको रुपमा जिल्ला समन्वय समिति जाजरकोटका प्रमुख काली बहादुर खत्री रहनुभएको थियो । त्यस्तै कार्यक्रममा अन्तराष्ट्रिय नार्काेनन अमेरिका दक्षिण पूर्वी एसिया प्रमुख बसन्त राज कुवँरले प्रशिक्षण दिनुभएको थियो ।
प्रशिक्षण कार्यक्रममा कुवँरले लागुऔषधको नकारात्मक प्रभावका बारेमा जानकारी गराएका थिए । यसको प्रयोगले समाजलाई पार्ने प्रभावका बारेमा जानकारी गराएका थिए । त्यस्तै नगरपालिकाले लागुऔषध रोकथाम तथा नियन्त्रणका लागि कस्तो रणनीति निर्माण गर्न सक्छ भनेर सहभागि शिक्षकहरु मार्फत व्यवहारिक रुपमा देखाएका थिए । उनले पालिकाको सर्बै संयन्त्रको साझा पहलबाट मात्र यसलाई रोकथाम तथा नियन्त्रण गर्न सकिने आशय बताएका थिए ।
त्यस्तै कार्यक्रमका प्रमुख अतिथि खत्रीले लागुऔषध नियन्त्रण गर्न सबै लाग्नुपर्ने बताए । जिल्लाको प्रमुख पालिका भेरी नगरपालिका भएको कारण यस पालिकामा काम गर्ने सके अन्य पालिकाहरुले पनि सिक्ने बताए । खत्रीले लागुऔषध नियन्त्रणका निम्ति सबै सरोकारवालाहरुलाई लाग्न आग्रह समेत गरे ।
त्यस्तै कार्यक्रममा नगरपालिकाका प्रमुख चन्द्र प्रकाश घर्तीले पालिकालाई लागुऔषध दुव्र्यसनी मुक्त नगरपालिका निर्माण गर्नका लागि यो अभियान सञ्चालन गरेको बताए । नगर प्रमुख घर्तीका अनुसार पालिकाले यस अभियानलाई मुख्य एजेण्डाका रुपमा अगाडि बढाएको बताए । एक पटक गरेको कार्यक्रमले मात्र लागुऔषध रोकथाम गर्न नसकिने भएकाले यसलाई अभियानका रुपमा अगाडि सारेको बताए । यूवा पुस्ता र बालबालिका यस अभियानका संवाहक रहेको प्रमुख घर्ती बताएका छन् । पछिल्लो समयमा बालबालिका र यूवा पूस्ता लागुऔषध दुव्र्यसनीमा फसेकोले पुस्ता जोगाउन यो अभियान अति आवश्यक रहेको बताए । सबै सरोकारवालाहरु यस अभियानमा जोडिन आग्रह समेत गरे ।
पलिकाले लागुऔषध रोकथाम तथा नियन्त्रणका लागि अभियानका रुपमा अन्य कार्यक्रमहरु पनि अघि सारेको छ । भोली नगरपालिकाका प्रत्यक वडाका आमा समूहका प्रतिनिधिहरुलाई प्रशिक्षण दिदै छ । त्यस्तै यसै अभियान अन्तर्गत खेलकुद,योगा लगायत विद्यालय स्तरमा अन्य कार्यक्रमहरु गरिने नगर स्वास्थ्य शाखा प्रमुख दिपक वलीले बताए ।
