जाजरकोट ।
अन्तराष्ट्रिय महिला दिवसको अवसरमा महिला पञ्चेबाजा समूह सम्मानित भएको छ । जाजरकोटको भेरी नगरपालिकाले खलंगामा रहेको महिला पञ्चेबाजा समूहलाई सम्मान गरेको हो । अन्तराष्ट्रिय महिला दिवसको अवसर पारि महिला पञ्चेबाजा समूहलाई नगरपालिकाले सम्मान गरेको हो ।
नेपाली समाजमा महिलाले बाजा बजाएको बिरलै देख्न र सुन्न पाइन्छ । गाउघरमा कुनै महिलाले झुक्किएर मादल बजाए पनि अनौठो मान्ने समाजमा पञ्चेबाजा बजाउनु निकै ठुलो उपलब्धि मानिन्छ । महिलाहरुको यो शाहसलाई उच्च मूल्याड्ढन गर्दै पालिकाले सम्मान गरेको पालिकाकी उप प्रमुख सिता जैसीले बताइन् । अन्तराष्ट्रिय महिला दिवसको अवसरमा पालिकाको आयोजनामा पालिकाको सभाहलमा कार्यक्रम राखिएको थियो । सोही कार्यक्रममा महिला पञ्चेबाजा समूहलाई सम्मान गरिएको हो । जैसीका अनुसार महिलालाई चुलो चौका मात्र सिमित राख्ने प्रवृति पछिल्लो समय कम हुदै गएको छ । महिला पञ्चेबाजा समूह महिला सशक्तिकरणको एक हिस्सा भएको पनि जैसीले बताइन् ।
नगरपालिकाले यसको संरक्षण र विकासका लागि आवश्यक सहयोग पहल गर्ने पनि उप प्रमुख जैसीले प्रतिबद्धता व्यक्त गरेकी छिन् ।
जाजरकोटमा महिला पञ्चेबाजा कसरी ?
जाजरकोटमा यस भन्दा पहिला यसरी संगठित रुपमा महिलाहरुले बाजा बजाएका थिएनन् । भजन गाउने श्रद्धालू भक्तजन रहेका केही महिलाले भने मादल र खैचडी बजाउदै आएका थिए । महिलाहरुले बाजा बजाएको देख्न चाडपर्व नै पर्खिन पर्दथ्यो । अहिले जाजरकोटको खलंगा बजारमा महिलाहरुले बजाएका बाजा घन्किरहेका हुन्छन् ।
यो कसरी सम्भव भयो होला ? केहीलाई थाहा छ । सामाजिक विकास कार्यालय जाजरकोटको आर्थिक सहयोग र जाजरकोट संस्कृति संरक्षण प्रतिष्ठानको परिकल्पनामा महिलाहरु पनि पञ्चेबाजा बजाउन सक्ने भएका हुन् । प्रतिष्ठानले जाजरकोटका सात पालिकाका केही महिलाहरुलाई तालिम प्रदान गरेको थियो । फलस्वरुप जाजरकोटमा पनि महिला पञ्चेबाजा समूह निर्माण सक्यो । अहिले यसको संरक्षणको लागि महिला समूह निर्माण गरिएको छ ।
कार्यक्रममा प्रमुख अतिथि जिल्ला समन्वय समिति सभापति काली बहादुर खत्री,अतिथि प्रमुख जिल्ला अधिकारी मेखबहादुर मंग्राती,महिला अधिकारकर्मी, नागरिक समाज लगायतको उपस्थिति रहेको थियो ।
