जाजरकोट । जाजरकोटको भेरी नगरपालिकामा दृष्टिबिहिनहरुको समावेशीकरण र सशक्तिकरणका लागि स्थानीय सल्लाहकार समितिको बैठक सम्पन्न भएको छ । असार ३० गते भेरी नगरपालिका ३ स्थित थकाली हाटेल एण्ड भान्साघरमा कार्यक्रम सञ्चालन भएको हो । जिल्लाका दृष्टि सम्बन्धी अपाङ्गता भएका व्यक्तिहरुको समावेशीकरण र सशक्तिकरणका लागि चालिने पहल कदमीका लागि बैठक सन्चालन भएको हो ।
कार्यक्रममा जिल्ला समन्वय समितिका संयोजक काली बहादुर खत्री,भेरी नगरपालिकाका नगर प्रमुख चन्द्र प्रकाश घर्ती,नेपाल पत्रकार महासंघ जाजरकोटका अध्यक्ष बालकुमार शर्मा,जिल्ला शिक्षा विकास तथा समन्वय इका जाजरकोटका कार्यालय प्रमुख लगायत जिल्ला अन्य सरोकारवालाहरुको उपस्थिति रहेको थियो । त्यस्तै नेपाल नेत्रहिन संघका केन्द्रिय महासचिव शिशिर खनाल,समावेशीकरण सल्लाहकार खोमराज शर्मा लगायतको उपस्थितिमा कार्यक्रम सञ्चालन भएको थियो ।
कार्यक्रममा दृष्टि सम्बन्धी अपाङ्गता भएका व्यक्तिहरुको लागि भएका कानुनी प्रावधान र स्थानीय तहको भूमिका लगायतको विषयमा खोमराज शर्माले प्रस्तुतिकरण गरेका थिए । त्यसपश्चात छलफलको क्रममा नगर प्रमुख घर्तीले भेरी नगरपालिकाले दृष्टि सम्बन्धी अपाङ्गता भएका व्यक्तिहरुलाई प्राथमिकतामा राख्न नसकेको स्विइकार गरेका छन् । तर आगामि वर्षहरुमा त्यस्ता व्यक्तिहरुलाई लक्षित गरि पालिकाले योजना बनाउने प्रतिबद्धता व्यक्त गरे । पालिकाले दृष्टि अपाङ्गता भएकाहरुलाई लक्षित गरि लिफ्टको व्यवस्था गरेको पनि बताए । त्यस्तै पालिकालाई दृष्टि सम्बन्धी अपाङ्गता भएका व्यक्तिमैत्री बनाउन पहल गर्ने समेत बताए ।
जिल्लाका अन्य पालिकामा दृष्टि सम्बन्धी अपाङ्गता भएका व्यक्तिहरुलाई लक्षित गरि कार्यक्रम तथा बजेट ल्याउन लगाउन समन्वय तथा पहल गर्ने प्रमुख काली बहादुर खत्रीले बताए ।
दृष्टिबिहिनहरुको समावेशीकरण र सशक्तिकरण परियोजना कर्णाली प्रदेशका जाजरकोट,सुर्खेत ,दैलेख र सल्यान गरी ४ वटा जिल्लामा सञ्चालनमा आएको छ । विशेष गरी दृष्टि सम्बन्धी अपाङ्गता भएका व्यक्तिहरु हक अधिकारका लागि यस परियोजनाले काम गर्ने परियोजनाकाी जाजरकोट जिल्ला सामाजिक परिचालक झरना रानाले जानकारी दिइन् ।
