जाजरकोट । राष्ट्रिय वातावरण तथा सम विकास समाज (निड्स) नेपालले जाजरकोट भेरी नगरपालिकामा ३०५ घर निर्माण गर्ने भएको छ। निड्स नेपालले भेरी नगरपालिका वडा नं १,३र ९ मा गरि ३ सय ५ अस्थायी आवास निर्माण गर्ने भएको हो। कार्तिक १७ राती गएको विनासकारी भुकम्पका कारण क्षती पुगेको भेरी नगरपालिकामा अस्थायी आवास निर्माण गर्ने निड्स नेपालले बताएको छ ।
बिहिवार भेरी नगरपालिकाको सभाहलमा एक कार्यक्रमको आयोजना गर्दै परियोजनाको बारेमा जानकारी दिएको थियो। निड्स नेपालले वडा नं १ मा ह्याविट्याट फर हुमानिटीको सहयोग अन्तर्गत ६३ र एल.ड्व्लु.आर अन्तर्गत १ सय १८अस्थायी आवास निर्माण गर्ने छ। त्यस्तै वडा नं ३ मा ह्याविट्याट फर हुमानिटी अन्तर्गत ६७ र वडा नं ९ मा एल.ड्व्लु.आर अन्तर्गत ५७ अस्थायी आवास निर्माण गर्ने योजना रहेको निड्स नेपालमा कार्यरत इन्जिनियर दिपेन्द्र बहादुर सिंहले जानकारी दिए।
त्यस्तै भेरी नगरपालिकामा करिब १ हजार लाभग्राहिलाई मनोपरामर्श सेवा दिने पनि सिंहले बताए । अस्थायी आवास निर्माण गर्दा लाभग्राहिलाई स्वच्छता सम्बन्धि सामग्री पनि दिइने बताइएको छ।
बिहीवार निड्स नेपालका कार्यक्रम निर्देशक बिनोद सिंह कडाराको अध्यक्षमा भएको कार्यक्रममा नगर प्रमुख चन्द्र प्रकाश घर्ती,उप प्रमुख सीता जैसी,कार्यक्रम लागू हुने वडाका वडा अध्यक्ष र सचिव,कार्यपालिका सदस्य,गैससका जिल्ला प्रतिनिधि लगातयको उपस्थिति रहेको थियो। कार्यक्रममा बोल्दै नगर प्रमुख घर्तिले परियोजना सफलताको शुभकामना दिएका थिए। नागरिकले न्याय पाउने गरि अस्थायी आवास निर्माण गर्न पनि निड्स नेपाललाई प्रमुख घर्तिले अनुरोध गरेका थिए ।
