कुलेन्द्र शाही/मध्यान्ह
सुर्खेत : सुर्खेतको भेरीगंगाका १३ वटा वडामध्ये ४ वटा वडा अझै पनि भाडाको भवनबाट सञ्चालन हुँदै आएका छन् । नगरपालिकाका वडा नम्बर ३, ७, ९ र १२ भाडाको घरबाट सञ्चालन हुँदै आएका हुन् । वार्षिकरूपमा लाखौं रकम भाडामै खर्च भए पनि वडा कार्यालय बनाउनतर्फ भने नगरपालिका, वडा तथा जनप्रतिनिधि अग्रसर भएको देखिँदैन ।
भेरीगंगामा वडा कार्यालय भवन नभएका वडाका कतिपय जनप्रतिनिधि २०७४ सालदेखि अहिलेसम्म निर्वाचित भएका छन् । एउटै वडा अध्यक्षले वडा कार्यालय चलाइरहँदा पनि वडा कार्यालय बनाउनमा ध्यान दिन सकेका छैनन् । भेरीगंगा नगरपालिका–७ को वडा कार्यालय अहिले पनि भाडामा चलिरहेको छ । उक्त वडा कार्यालय २०७४ सालबाटै भाडामा चल्दै आएको हो । वडाले भाडाबापत मासिक ४ हजार रुपैयाँ तिर्दै आएको छ ।
“हामीले सल्यानका एक जनाको घर भाडामा लिएर वडा कार्यालय सञ्चालन गरेका छौं, मासिक ४ हजार बढी रकम तिर्छौं”, वडा नम्बर ७ का वडा अध्यक्ष कर्णबहादुर मिजारले भने । उनी २०७४ सालको निर्वाचनमा पनि वडा अध्यक्ष भएर निर्वाचित भएका थिए भने २०७९ सालको निर्वाचनमा पुनः निर्वाचित भएका हुन् ।
यस्तै वडा नम्बर ९ को वडा कार्यालयको अवस्था पनि उस्तै छ । यो वडा कार्यालय पनि २०७४ सालबाट भाडामा चल्दै आएको छ । यस वडाले वडा कार्यालयको भाडा बापत मासिक ८ हजार रुपैयाँ तिर्ने गरेको छ । वडाले भाडाकै घर पनि तीन पटक फेरिसकेको छ । तर आफ्नो भवन बनाउनतर्फ कसैको पनि ध्यान जान सकेको छैन ।
यता वडा नम्बर ३ को वडा कार्यालय पनि भाडाको भवनमा छ । तर भाडाको भवनमा भएको वडा कार्यालय पनि जोखिममा छ । उक्त वडा कार्यालय फुसले छाएको माटोले बनेको घरबाट चलिरहेको छ । उक्त भवनलाई टाढाबाट हेर्दा निकै जोखिमपूर्ण छ । तर पनि वडाको आफ्नै भवन बनाउनका लागि कुनै पनि पहल भएको छैन ।
पहिलो कार्यकाल सकिएर दोस्रो कार्यकालको एक वर्ष बितिसक्दा पनि स्थानीय तहले आफ्नै भौतिक संरचना बनाउन सकेका छैनन् । सुविधायुक्त भवनको अभावमा स्थानीय तहको सेवा प्रवाह चुस्त र प्रभावकारी हुन सकेको छैन । साँघुरा भवन, कोठाबाटै अव्यवस्थितरूपमा कार्यालय सञ्चालन गर्नुपर्ने बाध्यता रहेको वडा अध्यक्षहरु बताउँछन् । सेवाग्राहीमैत्री पूर्वाधार र वातावरण छैन । वर्षौंसम्म भाडा तिरेर कार्यालय राख्दा राज्यलाई अतिरिक्त व्ययभार थपिएको छ ।
यता वडा नम्बर ७ का वडा अध्यक्ष आफ्नै वडाको भवन नहुँदा नागरिकहरूलाई असहज भएको बताउँछन् । उनले पहिलो ५ वर्ष आफ्नो कार्यकाल भएको र यस पटक पनि पुन अध्यक्ष भएको बताउँदै वडा कार्यालयको भवन निर्माणका लागि धेरै पहल गर्दा पनि भवन बनाउन नसकिएको बताए । उनले वडा कार्यालय भवन निर्माणमा निकै चुनौती भएको बताए । भौगोलिक विकताका कारणले पनि वडा भवन निर्माण हुन नसकेको उनको भनाइ छ ।
गत वर्ष वडाबाट ८ लाख बजेट छुट्याएको भए पनि केही समस्याका कारण वडा भवन निर्माण गर्न नसकिएको र यस पटक पनि नगरपालिकाबाट १५ लाख बजेट र वडाबाट ८ लाख बजेट विनियोजन गरेको उनको भनाइ छ । उनले जग्गा नभएकोले भवन निर्माण गर्न नसकिएको बताए । उनले सबैलाई पायक पर्ने ठाउँमा वडा कार्यालय राख्नुपर्ने तर त्यो ठाउँमा सबै कुराको सुविधा नभएको बताए ।
वडा नम्बर ९ का वडा अध्यक्ष प्रेमबहादुर आग्रीले पनि वडाको आफ्नै भवन बनाउनका लागि नगरपालिकासँग बारम्बार माग गरेको र नगरपालिकाले वडा भवन बनाउन कुनै चासो नदिएको बताए ।
वडा नम्बर १ को कार्यालय विद्यालयको भवनबाट चलिरहेको छ । २०७४ सालबाट नै उक्त वडा विद्यालयको भवनबाट चल्दै आएको वडा नम्बर १ का वडा अध्यक्ष दिनेश पुलामी मगरले जानकारी दिए ।
उनले विद्यालयको भवन अन्य ठाउँमा सरेको हुँदा आफूहरूले निःशुल्करूपमा विद्यालयको भवनबाट वडा कार्यालय सञ्चालन गरेको बताए । उनले यस वर्ष अन्य वडामा भवन बनाउने भनेर नगरपालिले निर्णय गरेको हुँदा अर्को वर्ष यहाँ वडा भवन निर्माण गर्ने प्रतिबद्धता जनाए । वडा कार्यालय सञ्चालनका लागि ग्रामीण क्षेत्रमा आवश्यकताअनुसारका भवन नपाउँदा टिनको छानोमै वडा कार्यालयको कामकाज सञ्चालन भइरहेको उनले बताए । यसले महत्वपूर्ण कागजात र सामानहरू चोरी हुन सक्ने जोखिम बढेको उनको भनाइ थियो ।
वडा नम्बर ७ को कार्यालय भाडामा चलेको हुँदा वडाले भाडा बापत २ लाख ८८ हजार खर्च गरेको छ । यस्तै वडा नम्बर ९ ले मासिक ८ हजार तिर्दै आएको छ । यसरी मासिक ८ हजारका दरले रकम तिर्दा वडाको ६ वर्षमा ५ लाख ७६ हजार खर्च भएको छ ।
