जाजरकोट । जिल्ला सदरमुकाममा ढुवानी गर्ने साधन अभावले निर्वाचन मतदान केन्द्रमा निर्वाचन सामग्री पुर्याउन कठिन भएको छ । जिल्लामा साना सवारीसाधन राजनीतिक दलहरूले भाडामा लिएर निर्वाचन प्रचारप्रसारमा लिएपछि निर्वाचन सामग्री ढुवानी गर्न असहज भएको हो । गाडीको अभावले कर्मचारी पनि तोकिएको मतदान स्थलसम्म पुग्न कठिन भएको छ ।
सबैभन्दा टाढाको जुनीचाँदे गाउँपालिकाका १८ वटा मतदान केन्द्रका मतदान अधिकृतहरूलाई बोलाएर निर्वाचन कार्यालयले मंगलबारबाट नै निर्वाचन सामग्री र मतपेटिका बुझाएर सुरक्षासाथ जाने व्यवस्था मिलाएको छ । अन्यलाई दूरीअनुसार बुधबार नै सबै सामग्री बुझाएर मंसिर १ गते मतदान केन्द्रमा पुग्ने गरी व्यवस्था मिलाइएको मुख्य निर्वाचन अधिकृत केशव चपागाईंले बताए ।
निर्वाचनमा खटिएका मतदान अधिकृतहरूले निर्वाचन सामग्री बुझे पनि मतदान स्थलसम्म पुग्न सवारीसाधनको अभाव भएको छ । जुनीचाँदे १ स्थित भैरव माविमा रहेको मतदान केन्द्रका अधिकृत धिरेन्द्र शाहले जुनीचाँदेका ८ वटा मतदान केन्द्रका लागि जीप रिजर्ब भएको बताए । तर १० वटा केन्द्रको लागि सदरमुकाममा भाडामा जिप भेटिएको छैन । मतपेटिका, निर्वाचन सामग्री, सुरक्षकर्मी र एउटा बुथमा ८ कर्मचारी लैजान पर्ने भएपछि थप समस्या भएको शाहले बताए । खलंगा सदरमुकामबाट जुनीचाँदे पुग्न रिजर्ब जिपले २५ हजार भाडा तोके पनि आयोगले ७ हजार ५ सय मात्रै दिएपछि कर्मचारीले नै व्यहोर्नुपर्ने अवस्था आइपरेको कर्मचारीको गुनासो छ । बुधबार कुशे, बारेकोट, शिवालय, गाउँपालिका र नलगाड तथा छेडागाड नगरपालिका, अन्तमा सदरमुकाम भेरी नगरपालिकालाई निर्वाचन सामग्री हस्तातरण गरिएको छ ।
निर्वाचन सुरक्षका लागी सबै मतदान केन्द्रहरूलाई पुग्ने गरी सुरक्षाकर्मर् ीखटाई मतदान केन्द्रहरूमा पुगिसकेको प्रमुख जिल्ला अधिकारी अन्जन न्यौपानेले बताए । निर्वाचनका लागि मतदान अधिकृत, सहायक मतदान अधिकृत, सहायक कर्मचारी, कार्यालय सहयोगी र स्वयंसेवकलगायत कर्मचारी मंसिर १ गतेसम्म पुगी सक्नुपर्छ । मतदान केन्द्र पुगेर मतदान केन्द्रमा पुगेर सूचना प्रकाशन गर्नुपर्ने, मतदानस्थलको प्रबन्ध, सर्वदलीय बैठकलगायत कार्यहरू सुरु हुने मुख्य निर्वाचन अधिकृत चपागाईंले बताए । उनका अनुसार मतदान अधिकृतलाई अशक्त र वृद्धवृद्धाको नाममा अर्को वारेस भएर मतदान गर्न दिनेमा निगरानी गर्न कडा निर्देशन दिइएको छ ।
जिल्लाभर १ सय ४२ स्थायी र एक अस्थायी मतदान केन्द्र छन् । ८३ मतदान स्थल कायम गरिएको छ । प्रतिमतदान केन्द्रमा एक मतदान अधिकृत, एक सहायक मतदान अधिकृत, पाँच सहायक कर्मचारी र एक कार्यालय सहयोगी कर्मचारी रहनेछन् । अस्थायी मतदान केन्द्रमा एक मतदान अधिकृत, एक सहायक मतदान अधिकृत, एक सहायक कर्मचारी र एक कार्यालय सहयोगी रहने जिल्ला स्थित जिल्ला निर्वाचन अधिकृत नवीनकुमार कठायतले बताए । त्यसैगरी चार स्वयंसेवक मतदान केन्द्रमै नियुक्त गरेर खटाइने निर्वाचन कार्यालय जाजरकोटले जनाएको छ । जाजरकोटका सातवटै स्थानीय तह गरी १ लाख ३ हजार ६३ मतदाता छन् । प्रदेशसभा सदस्य निर्वाचन क्षेत्र १ मा पुरुष २९ हजार ४ सय २२, महिला २७ हजार १ सय ४३ र अन्य १ जना गरी जम्मा ५६ हजार ५ सय ६६ मतदाता छन् ।
#कान्तिपुर#
